Markanan Desmaskara

Tempu ku mi tabata mucha, mi mama i tata tabata tur kos pa mi. Nan tabata duna mi siguridat. Ora ku mi pensa riba mi mama i tata mi emoshon ta yena. Kasi mi por saka mi man mishi ku mi mama su kútis fini koló di mespel. Mi mama, haltu i elegante banda di mi tata kende tabatin bon tipo. Den bista di hopi un pareha prominente i ku klase. Mi mama tabata bula bai Miami por lo ménos kuater bia pa aña pa kumpra pañanan bunita, di kalidat i na moda pa 12 bende i naturalmente tambe pa nos mes bisti. Mi no por kòrda ni un momento ku mi mama no tabata asina! Mi mama tabata esun ku mi tabata bai tur kaminda kuné. Mi tabata un ekstenshon di mi mama. Kaminda mi mama ta, ami ta. Sea ta botika òf Mensing's Caminada, mi tabata serka dje. Maske nos bai pa kumpra un kos so, nos ta sali ku mas. Mi tabata bras'é, wak e ku wowo lif te ora e kai na mi pena. Di otro un banda mi mama tabata strèn i tabata suta nos ora tabatin mester. Mi tata nunka tabata rabia ku nos. Te kaminda mi ta kòrda, ta un bia so el a straf mi, pa despues e mes t'esun ku ta bin puntra si mi ta oké i ta trese kos dushi den kamber pa mi. E ta esun ku tabata hiba i trese nos den su outo nèchi, yen di stail. E tabata muskuloso, gusta bisti bon i yama atenshon. E tabata mi héroe i mi tabata gusta broma kuné! Tur dos mi mayornan tabatin bon smak pa tur loke ta bunita, ku klase. kolonianan europeo ku ta hole dushi, 13 pues nan tabata biba bon. Kiko ku mi tabatin mester di dje mi tabata haña; manera paña, kèts, sapatu, kos di hunga i mi kos preferí...Barbi. Mi tabata gusta hunga ku pòpchi mashá. Pa mi kumpleaño, pa Pasku òf pa kualke otro okashon ku un hende puntrá mi kiko mi ke, mi kontesta standart tabata un Barbi òf algu pa mi por hunga ku e Barbi. Mi tabatin kushina, outo, kabai, Kèn, kama...tur spesial di 'Mattel', ku ta e marka di Barbi. Mi a krea un mundu di Barbi den mi kamber bou di mi büró, einan tur loke mi tabata mira den bida real mi tabata usa mi imaginashon pa krea esaki meskos pa mi Barbinan. Pues mi tabata krea un mundu ideal pa nan. E mundu di pafó mi ker a trese bèk den mi kamber i inkorporá tur esaki den mi mundu di fantasia. Un mundu ku no ta eksistí. E mundu ku ami tin den mi kabes. Kaminda tur kos ta perfekto! Ami ta krea mi mundu di fantasia, kaminda nada malu no ta pasa ku hende. Den mi mundu di fantasia semper tin un bon final. Einan 14 malu no ta eksistí i mi tabata mira tur kos dor di un brel ros. Ros, pasobra mi tabata gusta koló ros i tur mi kosnan di Barbi tambe tabata ros. Tur mi kosnan mester tin ros den nan. Mi kamber tabata ros i blanku. Pa mi e koló ros tabata representá; mucha muhé lif. Den mi kamber kaminda ku mi tabata pasa hopi tempu, mi por a keda oranan ta biba den mi mes mundu di fantasia. Mi mihó amigu, kende tabata mi bisiña, tabata bin hunga serka mi i e tabatin mag di hunga ku Kèn; e kasá di Barbi. Nos no tabata kansa di hunga, nos tabata fasiná ku tur e weganan, ma e ora si tabata pasa muchu lihé. Pero asina ku e stèm fuerte di mi yaya resoná den kas pa mi amigu bai su kas, wega a kaba mesora. Ora Yaya papia tur hende ta tende! E tabatin un stèm manera e kampana ku nan ta bati ora ku tumba ta dal den e temporada di karnaval. Mi yaya ta puntra mi amigu semper si e no tin kas! Den nos kas nos tabatin un total di kuater kamber, kada un ku su baño.

• | Author: Sydelle Ricardo
• | Publisher: Saved To Serve International Ministry
• | Publication Date: Nov 08, 2022
• | Number of Pages: 242 pages
• | Language: Papiamento
• | Binding: Paperback
• | ISBN-10: 1737964732
• | ISBN-13: 9781737964735